АҞӘА, абҵара 22 - Sputnik. Апарламент аиҳабы Лаша Ашәба диԥылеит Урыстәыла Афедерациатә хеилак ахантәаҩы ихаҭыԥуаҩ Константин Косачиов, абри атәы аанацҳауеит Жәлар Реизара апресс-маҵзура.
Косачиов иазгәеиҭеит шықәсык аԥхьа аганқәа шеиԥылахьаз, уи алҵшәақәа рыла апарламентбжьаратә усеицура еиҳа активла имҩаԥысло иалагеит. Ари аамҭа иалагӡаны ахҭыс дуқәа ыҟан, Урыстәыла Аԥсны азханаҵеижьҭеи 15 шықәса аҵреи 1992-1993 шш. рытәи аибашьраан Аԥсны Аиааира 30 шықәса ахыҵреи.
"Афедерациатә хеилак аделегациа Аҳәынҭқарратә Думаҟынтәи рколлегацәеи дареи арҭ аҩныҳәак раан Аԥсны иҟан, рҩызцәа ирывагылан иаԥылеит урҭ амшқәа, ареспублика знысыз амҩа ҳгәалаҳаршәон, уи узхыҽхәаша фырхаҵаратә мҩоуп. Даҽазныкгьы ҳара агәра аагеит Урыстәыла иҟанаҵаз ашьаҿа шиашаз, ҳара еснагь Аԥсны ҳадгылазаауеит, шәыгәҭакқәеи шәапшьгамҭақәеи зегьы рыҟны", - иҳәеит Косачиов.
Аганқәа аиԥылараан ирылацәажәеит аԥсны-урыстәылатәи аусеицура, апарламентбжьаратә усеицура, азакәанԥҵарақәа реишьаршәалара, ҷыдала аҳазалхратә усхкаҿы, уҳәа ирыдҳәалоу азҵаарақәа.