АҞӘА, абҵара 22 - Sputnik. "Россия-24" акорреспондент Борис Максудов, УАМ аԥырҩы дызҭам ахархәагақәа рыла Запарожиатәи аобласт аҟны ианрылахысуаз иоуыз ахәрақәа ирыхҟьаны иԥсҭазаара далҵит ҳәа иҳәеит Владимир Соловиов "Соловьев LIVE" аефир аҿы.
"Абыржәыҵәҟьа аԥсӡы ҳзааит. Ҳколлега Борис Максудов иоуыз ахәрақәа ирыхҟьаны иԥсҭазаара далҵит. Иацаахыс иалшо зегь ҟарҵон еиқәырхаразы", - ҳәа иҳәеит иара.
Урыстәыла АдәАР хаҭарнак ҷыда Мариа Захарова илҳәеит акыр шықәса раахыс Киев урыстәылатәи ажурналистцәа "цәҟьараны" ишырԥхьаӡо.
Жәларбжьаратәи амедиагәыԥ "Россия сегодня" адиректор хада Дмитри Киселиов Максудов иҭахара ахҳәаа аҭо иазгәеиҭеит ажурналист хаҵарыла дышҭахаз, ари азанааҭ иахьа еиҳа-еиҳа аԥшшәы аибашьҩы ицәамаҭәа аԥшшәы аанахәо ишалагаз.
Уаанӡа Урыстәыла атәылахьчара адырра ҟанаҵеит ахаша, абҵара 22 рзы УАМ аԥырҩы дызҭам ахархәагақәа рыла Запарожиатәи аобласт аҟны аҭагылазаашьаз аматериал зырхиоз урыстәылатәи ажурналистцәа ирылахысит ҳәа. "Россия-24" акорреспондент Борис Максудов ахәрақәа иманы Москваҟа дыргеит.