АҞӘА, абҵара 23 – Sputnik. Жәларбжьаратәи амедиагәыԥ "Россия сегодня" адиректор хада Дмитри Киселиов УАМ урыстәылатәи ажурналистцәа рылахысра рымчымхара иазкуп иҳәеит. Абри атәы аанацҳаит РИА Новости.
"Рымчымхара, рымчыдароуп асеиԥш дзырҟаҵаз. Мамзар ажурналистцәа икылкааны ушԥареихсуеи?" - иҳәоит Киселиов.
Уаанӡа Атәылахьчара аминистрра адырра ҟанаҵахьан УАМ аԥырҩы дызҭам ахархәагақәа рыла Запорожиатәи аобласт аҟны иҟоу аҭагылазаашьаз аматериал аззырхиоз урыстәылатәи ажурналистцәа ирылахысит ҳәа.
"Россия-24" акорреспондент Борис Максудов ахәрақәа иманы Москваҟа дыргеит. Иара иԥсҭазаара ашәарҭара иҭагылам.