АҞӘА, абҵара 27 - Sputnik, Бадраҟ Аҩӡба. Аекологиазы Аԥсны Аҳәынҭқарратә еилакы аҳауагәаҭаҩ Диана Ҭраԥшь Sputnik аинтервиу аҭо илҳәеит аҩаша, абҵарамза 28 рзы амш шыбзиахо.
"Амшын еиқәаҿы имҩаԥысраны иҟоу асиноптикатә процессқәа абас иҟоуп: атмосфератә қәыӷәӷәара акыр аҽеиҭанакуеит, иара убас аҳауа ԥхарра цәгьала аҽаԥсахуеит. Иацы аҳауа 20 градус рҟынӡа иԥхан, иахьа ҽынла акыр илаҟәит - +10 градус рҟынӡа", - ҳәа азгәалҭеит.
Абҵара 27 хәылбыҽханӡа атмосфератә ҳауа хьшәашәа мҩасуеит, аҳауа аццакра аҽеиҭанакуеит, секундк ала 10-15 метр амч ҟалоит. Иара убас ақәаршыҩ, адыд-мацәыс, ашьхараҿы асы ауеит, амшын ацәқәырԥара 4-5 балл иҟалоит, атмосфератә фронт аниасуа, уи ф-баллк ҟынӡа иазҳар ауеит.
"Ҳара ас ишаҟалоз азԥхьагәаҳҭон, ҳазыԥшын. Уаҵәы уажәшьҭа зегь еиқәтәоит. Антициклон ду ҟалоит, аҳауагьы абҵарамза иашаԥу еиԥш иҟалоит", - лҳәеит Ҭраԥшьԥҳа.
Уаҵәы, абҵарамза 28 рзы аҳауаԥхарра 6-11°C иҟалоит, аԥша еиқәтәоит, уи аццакра 3-8 метра секундк ала иҟалоит, ақәа леиӡом.