АҞӘА, абҵара 27 - Sputnik. Аԥшатлакәи амшынеисреи Очамчыра араион уамак аԥхасҭа азнамуит ҳәа Sputnik иазеиҭеиҳәеит араион ахада ихаҭыԥуаҩ Артимон Габелаиа.
Иара иажәа иацҵо иҳәеит ҭыԥқәак рҿы аԥша аҵлақәа канажьит, урҭ афымцацәаҳәақәа ԥнаҵәеит ҳәа. Амш иалагӡаны аусурақәа мҩаԥгахоит, ауаа алашара роуртә иҟалоит.
Очамчыра ақалақь аҿы ацәқәырԥақәа аҟәара агәамсам рацәаны иқәнажьит, уажәы акоммуналтә усзуҩцәа уи ақәгара иаҿуп.