АҞӘА, абҵара 29 – Sputnik. Миллионҩык иреиҳаны аԥсшьацәа Аԥсны иаҭааит 2023 шықәсазы ҳәа иҳәеит акурорттә сезон алкаақәа рзыҟаҵара иазкыз апресс-конференциаҿы атуризм аминистр ихаҭыԥуаҩ Асҭамыр Барцыц.
Иара иажәақәа рыла, 300 нызқьҩыуаак рыԥсы ршьон асасааирҭақәеи ахатә сектори рҿы.
Иҭиу абилеҭқәа рышьаҭала аекскурсиақәа мҩаԥыргеит ҳәа ишьоуп 936 591-ҩык.
Ажьырныҳәа 1 - абҵара 1 рыбжьара атуризм аусхк аҟны ашәахтәшәара 742,8 млн мааҭ инаӡеит, арахь иаҵанакуеит аиуристхаҿқәа русура – 633,3 млн мааҭ, ахаланаплакыҩцәеи ахатә сектори русура – 109,5 млн мааҭ.
Аекскурсиақәа мҩаԥызго аиҿкаарақәеи ахаланаплакыҩцәеи 33,8 млн мааҭ ашәахтә абиуџьет иаларгалеит.
2022 шықәсазы атуристтә обиектқәа рҟынтәи Аԥсны абиуџьет иалагалан 495,6 млн мааҭ, арахь иаҵанакуан:
аиурист хаҿқәа рҟынтәи – 415,8 млн мааҭ,
ахаланаплакыҩцәеи ахатә сектори – 79,7 млн мааҭ.
Аиҿырԥшра иаанарԥшуеит 2023 шықәсазы ашәахтәеизгара шеиҳахази атурист обиектқәа рыҳасабырбақәа реизҳареи.