АҞӘА, ԥхынҷкәын 1 - Sputnik. Аԥсни Шьамтәылеи ақыҭанхамҩа аусхк аҟны аусеицуразы Аиқәшаҳаҭра рнапы аҵарыҩраны иҟоуп. Аԥсны Аминистрцәа реилазаара ақәҵара аднакылеит атәылақәа рыҩба еишьашәалоу рминистррақәа рыбжьара аилацәажәарақәа, адокумент анапаҵаҩра мҩаԥысырц.
Аиқәшаҳаҭра иазԥхьагәанаҭоит абарҭ ахырхарҭақәа рҿы аусеицура:
ақыҭанхамҩатә ҭҵаарақәа,
аҵиааӡареи аҵиаахьчареи,
арахәааӡареи арахә ргәабзиареи,
ақыҭатә ҵакырақәа рырҿиара,
аԥсыӡкреи аӡыкультуреи,
ақыҭанхамҩа аекономика.
Аиқәшаҳаҭрақәа алыршоуп 2018 шықәса цәыббра 4 рзы анапы зҵаҩыз Аԥсны Аҳәынҭқарреи Шьамтәылатәи Ареспубликеи рыбжьара аиҩызареи аусеицуреи рзы Аиқәшаҳаҭреи 2018 шықәса цәыббра 6 рзы анапы зҵаҩыз Аԥсны Аҳәынҭқарреи Шьамтәылатәи Ареспубликеи рыбжьара аекономикатә, ахәаахәҭратә, аҭҵаарадырратә, атехникатә, акультуратә усеицуразы Аилак аицаԥҵаразы Аиқәшаҳаҭреи рыԥҟарақәа рышьаҭала.