АҞӘА, ԥхынҷкәын 1 – Sputnik, Бадраҟ Аҩӡба. Аминистрцәа реилазаара Аԥсны 2023-2024 шықәсазтәи ҭагалан-аӡын ԥсыӡкраамҭаз аԥсыӡнхамҩа аусура аҭышәныртәалараз ауснагӡатәқәа шьақәнарӷәӷәеит.
Азин ыҟам аԥсыӡкраамҭаан ирхьшәашәоу, аҵаарку, аҿыцкыра ԥсыӡ аекспорт. Азин ыҟоуп урыстәылатәи аԥсыӡкратә наплакқәа заҵәык раархәара.
Аиурист хаҿқәеи ахаланаплакыҩцәеи азин рымам аԥсыӡкраамҭаан аҳәаанырцә ԥсыӡкыга ӷбақәа аԥсыӡкра радԥхьалара, урҭ еиуеиԥшым амшынҵауларахь зынашьҭра алшо акаҭақәа рыла еибыҭазар.
2023-2024 шықәсқәа ҭагалан-аӡынтә ԥсыӡкраамҭазы Аекологиаз аҳәынҭеилакы анапы ианҵоуп:
аԥсыӡкраз аштаб аԥҵара,
аԥсыӡкра иалахәу аӷбақәа рзеиԥш хыԥхьаӡара ахылаԥшра аиҿкаара,
акамшьиа аӷбақәа рҿы реилыҟәшәареи иссоу амшын алажьреи рақәиҭымтәра, аха аԥсыӡ маҷ амшын алажьра ахҭыс азгәаҭазар, аматериалқәа азырхианы ақыҭанхамҩа аминистррахь рынашьҭра.
Иара убасгьы азин ыҟам:
амшын аԥшаҳәа инаркны амшын агәахьы 500 метра рҟынӡа аԥсыӡкыгаӷбақәа рыла аԥсыӡкра,
амшын аԥшаҳәа инаркны амшын агәахьы х-мильк иреиҵамкәа аԥсыӡкыгақәеи аӷбаӷәрақәеи рыӡәӡәара,
аӡиасқәа Ԥсоу, Бзыԥ, Мҷышьҭа, Гәымсҭа, Кьалашәыр, Кәыдры, Аалӡга, Егры амшын иахьалалои азин ахьыҟам араионқәеи рҿы аԥсыӡкра, аԥсыӡкыгаӷбақәеи атранспортӷбақәеи рыргылара.