АҞӘА, ԥхынҷкәын 11 - Sputnik. Урыстәылатәи аҳазалхыҩцәа Аԥснынтәи изакәанымкәа 63 нызқь цыра асигареҭ алагалара аԥдырҟәҟәааит. Абри атәы аанацҳауеит Шәача ақалақь иатәу Краснодартәи аҳазалхра апресс-маҵзура.
Аконтрабандатә аалыҵ рбеит ԥшь-машьынак ирҭаны. 673 цыра Business Royals захьӡу сигареҭҭрақәа ҵәахын ҷыдала амаӡа ҭыԥ ахьыҟаҵаз амашьына Chery абампер аҿи ашьапықәыргыларҭаҿи, даҽа 300 сигареҭҭра Instark-и Slim Blue-и - амашьына ВАЗ-2106 уаанӡа абылтәыҭаҭәарҭа ахьыҟаз.
Иара убас 1150 Business Royals захьӡу асигареҭҭрақәа рбеит "Шевроле Нива" автомашьына ашьапықәыргыларҭақәеи ашьҭахьтәи атәарҭақәа рыҩнуҵҟеи, "Пежо Партнер" аҿы акәзар - арԥхаратә маругақәа ахьықәгылоу аҩнуҵҟа. Уа иԥшаан 1052 Business Royals захьӡу асигареҭҭрақәа.
"Ԥшь-машьынак рҟны аҭыԥ маӡақәа ирҭаҵаны имҩаныргоз асигареҭҭрақәа рхыԥхьаӡара 3175 цыра ыҟоуп. Еиду Арабтә Емиратқәа рҟны иҟаҵоу аҭаҭын аалыҵ урыстәылатәи акцизтә маркақәеи иҷыдоу адыргақәеи рықәыргыламкәа ииаргон", - иҳәеит аҳазалхратә ҭыԥ аиҳабы Алексеи Быков.
Аконтрабандатә ҭаҭын аалыҵи автомобилқәеи рымхуп, административтә зинеилагарақәа рзы ашьаусқәа хацыркуп.