АҞӘА, ԥхынҷкәын 14 - Sputnik. Аԥсны Иреиҳаӡоу аӡбарҭа Емир Кьыркьынаӡе Тамшь иҟалаз ақәыларазы ахара ихаранаҵеит ауаҩшьра, ақәылара, закәаншьаҭада ихысуа абџьар амазаара рзы. Абри атәы аанацҳауеит Аӡбарҭа асаит.
Кьыркьынаӡе 15 шықәса иқәҵоуп зрежим ӷәӷәоу аколониаҿы ихигаразы, хараԥсада имазара имххоит.
Аӡбамҭа азинмчра аиуаанӡа ԥсахрада дшырбаандаҩу дыҟоуп.
Уаанӡатәи адыррақәа рыла, Емир Кьыркьнаӡеи Вальтер Шьамаҭааи ирдыруан Тамшь ақыҭан Ҭенгьиз Рацба иҩны ишыҩнагылаз акриптоԥара амаининг азы амаругақәа, дара еицәажәеит урҭ рӡарц.
2022 шықәса мшаԥы 28 рзы гәҩарас ирымоу арҭ аҩыџьагьы Калашников иавтомат 7,62 миллиметри 5,45 миллиметри иҟоу ахқәа рыла еибыҭаны Рацба иҩны иҩналеит.
Дара амаругақәа анаҿырхыз аамҭазы, аҩны аԥшәма иақәикит. Ацәгьоуцәа иареи аисра иалагеит. Ҭенгьиз Рацба иашьа гәакьа Ҭамази иашьа дихәарц ацәгьоуцәа дрыжәлеит, аха Емир Кьыркьынаӡе уи автоматла дишьит. Иара убас Вальтер Шьамаҭаагьы дызхыԥсаашаз ахәра иоуит.