АҞӘА, ԥхынҷкәын 14 - Sputnik. 31 шықәса раԥхьа Лаҭа ақыҭа ианахаԥраауаз ақырҭцәа изеихсны икарыжьыз авертолиот аԥҽыхақәа Гәдоуҭаҟа инаргеит ҳәа аанацҳаит Аԥсны ахада ипресс-маҵзура.
Абри азы атәыла ахада ҵыԥх диҳәахьан Сергеи Дбар ихьӡ зху Аԥсны жәлар Рџьынџьтәылатә еибашьра амузеи аиҳабы Гәыгәыца Џьыкырба.
"Изыхәҭоу зегьы адҵақәа рыҭан, аҭагылазаашьа ҷыдақәа рминистрра рыцхыраара рыманы Лаҭантәи Гәдоуҭаҟа инаргеит авертолиот аԥҽыхақәа", - лҳәеит лара.
Урҭ аԥҽыхақәа амузеи аҿы експонатс ицәырыргоит, дара дыргылоит авертолиот иҭаблыз рфотосахьақәеи наӡаӡатәи амцеи рааигәара.
31 шықәса раԥхьа, ԥхынҷкәын 14, 1992 шықәса рзы иҟалеит Аԥсны жәлар Рџьынџьтәылатә еибашьраан реиҳа ихлымӡааххаз арыцҳара. Тҟәарчалынтәи Гәдоуҭаҟа ахҵәацәа згоз авертолиотқәа руак ақырҭуа мпыҵахалаҩцәа ракетала иеихсны икарыжьит. Аракета ҭырҟьан Қырҭтәыла Аҳәынҭсовет ар ирымпыҵакыз аҵакыраҟынтә.
Авертолиот каҳаит Гәылрыԥшь араион Лаҭа ақыҭан. Авертолиот иҭатәаз 87-ҩык апассаџьырцәа зегьы ҭаблит. Урҭ рыбжьара иҟан 35-ҩык ахәыҷқәеи ааҩык зцәазтәымыз аҳәсеи.
Авертолиот иҭан Владимир Анцупови Аслан Занҭариеи назлаз жәаҩаҩык аибашьцәа – еицырдыруаз аԥсуа командирцәа, Аԥсны Афырхацәа.