Агәыҳалалратә фондқәа "Ашанеи" "Кьарази" ҩаԥхьа ихацдыркит акциа "Ашанаҵла". Ирацәоума Аҵаа Бабадуи Асҭыԥҳаи рыхьӡала инашьҭу асалам шәҟәқәа, ишԥамҩаԥыслои акциа, иззыҳәозеи ахәыҷқәа, абри атәы арадио Sputnik иазеиҭалҳәеит акультура-гәыҳалалратә фонд "Ашана" Амассатә информациатә хархәагақәа рымадараз аменеџьер Асида Мархолиаԥҳа.
Агәыҳалалратә фондқәа "Ашанеи" "Кьарази" ракциа "Ашанаҵла" 350-ҩык ахәыҷқәа ашықәсҿыцазтәи ргәаҳәара нанагӡоит. Ахәыҷқәа ргәаҳәарақәа зну ашәҟәқәа аԥҟасахьақәа рыҭаны акультура-усутә ҭыԥ Гәыма игылоу аԥсаӡ аҿы ихыршьит.
"Ахәыҷқәа шеиԥшым еиԥш дара рысаламшәҟәқәагьы еиԥшым, дарбанзаалак имоуп ихатәы гәазыҳәара. "Ашана" аҟынтә иҟоуп 70 саламшәҟәы. Дара уаҟа иазгәарҭон дара рзы ихадоу аҳамҭа – ргәабзиара ҳара ишраҳҭахьоу. "Кьараз" ахәыҷқәа еиҳарак амаҭәа иаҳәоит. Уи даара угәы арԥшаауеит, угәаҵанӡа инаӡоит", - ҳәа еиҭалҳәеит Мархолиаԥҳа.
Иаҳа инеиҵыху аиҿцәажәара шәазыӡырҩыр шәылшоит аудиофаил аҿы.