АҞӘА, ԥхынҷкәын 19 - Sputnik. Гагра араион Аҩнуҵҟатәи аусқәа русбарҭа аҭҵааратә ҟәша аусзуҩцәа имҩаԥыргоит ашьаусԥшааратә гәаҭара Бзыԥҭа аҳаблан инхо аҭыԥҳа апетарда лымпыҵаԥжәаны ларӷьа напы ахәрақәа ахьаиоуз инамаданы. Абри атәы аанацҳауеит аусбарҭа апресс-маҵзура.
Иазгәаҭоуп амашәыр шыҟалаз аԥшьаша, ԥхынҷкәын 14 асааҭ 21:20 рзеиԥш Ешба имҩаҿы адәқьан "Кристалл" азааигәара.
"Апетарда зымпыҵаԥжәаз аҭыԥҳа ларӷьа напы ахәрақәа аиоуит, ахәышәтәырҭахь даннарга, лыԥшьнацәа ҽнахит ҳәа адиагноз лзықәдыргылеит", - ҳәа аанацҳауеит аусбарҭа.
Азинхьчаратә усбарҭақәа русзуҩцәа ахҭыс збаз ауаа ирыҿцәажәеит, апиротехникатә маҭәахәқәа рыҭира азакәан иахьынӡақәшәо аҭҵааразы азыҳәақәа нашьҭуп, аӡбарҭа-медицинатә експертиза амҩаԥгара азгәаҭоуп.
Агәаҭара алҵшәақәа рыла ашьаусԥшааратә ӡбамҭақәа рыдыркылараны иҟоуп.