"Ашықәс иреиӷьу аусумҭа" ҳәа аҳамҭа иаԥсахаз асахьаҭыхҩы Руслан Габлиа арадио Sputnik аефир аҟны далацәажәеит аицлабрахь инарго аусумҭақәа рыхә шыршьо, арҿиаҩы иҟазара гәылҭәааны аарԥшразы ҭагылазаашьақәас имазарц ахәҭоу.
Аҳәынҭқарратә премиа аиуразы асахьаҭыхыҩцәа рыбжьара аицлабра 2001 шықәсазы иаԥҵан. Аицлабра аԥҟарақәа инарықәыршәаны, аҳәынҭқарратә комиссиа есышықәса хҩык аиааира згаз алнакаауеит.
Асахьаҭыхҩы Руслан Габлиа иусумҭа атриптих "Анатиурморт" 2023 шықәсазы иранаршьоз аҳәынҭқарратә премиа "Ашықәс иреиӷьу аусумҭа" аҿы аиааира агеит. Аҩбатәи аҭыԥ иаԥсахеит Амиран Адлеиба Сариа Лакоба илызку искульптура "Агәхьаа", ахԥатәи - Диана Хынҭәԥҳа лусумҭа "Агаҿа".
Уи адагьы, акультура аминистрра аҟынтәи аҳаҭыр шәҟәқәа роуит асахьаҭыхыҩцәа Илиа Ҵәыџьбеи Аԥшьа Ҳагԥҳаи.
"Асахьаҭыхҩы есымша асахьа ҭихуазароуп. Ашықәс анынҵәо аҳамҭа сырҭап ҳәа ахәыцра ыҟаӡам, избанзар ауаа иргәаԥхо ҳәа уалагар уарҟьалоит. Аӡә далахысхуеит, далазжьоит ҳәа ахәыцра иашаӡам. Асахьаҭыхҩы иҭихуа бзиа иибо, иԥсы ахьҭоу, убри сахьӡандаз ҳәа дызҿу, аамҭа илнаршаны ихиркушеит ҳәа ииԥхьаӡо усумҭак аума, ҩба, хԥа, хәба-фба роума Ацәыргақәҵатә зал ахь иааҳгоит. Сара анатиурмортқәа рнаҩс иҵегьы аусумҭақәа назгеит, аха иҳаӡбеит асахьаҭыхыҩцәа зегьы хԥа-хԥа усумҭа иреиҳамкуа ицәырҳго ", - иҳәеит Габлиа.
Асахьаҭыхҩы ицәажәараҟны убасгьы инаҵшьны иазгәеиҭеит, Асахьаҭыхратә галереиа иахьа Аԥсны аҟамзаара рыцҳараны ишыҟоу, азҵаара ҵарны ишықәгылоу.
Аицәажәара иаҳа инеиҵыхны ишәаҳар шәылшоит аудиофаил аҟны хыхь.