Ашықәс ҿыц аламҭалаз АҶА аусзуҩцәа апиротехника ахьырҭиуа адәқьанқәа ргәаҭарақәа мҩаԥыргоит. Агәаҭарақәа ирыхрыжьуеит адәқьанқәа реиԥш аџьармыкьаҿи аԥсаӡ хада ахьгылоу иҟоу адәны ихәаахәҭуагьы. Арҭҟәацгақәа ирыцу амашәыри, рыҵәахышьа аԥҟарақәеи, аџьармыкьаҿы изҭиуа ргәаҭарақәа шымҩаԥысуеи ртәы арадио Sputnik аҟны далацәажәеит АҶА абылраҽацәыхьчара-хылаԥшратә усбарҭа аиҳабы ихаҭыԥуаҩ Аркади Аршба.
Апиротехника аҭираан иаҭаху ашәҟәқәа рыла еиқәшәазароуп, изыҩноу аҭыԥқәа, адәқьанқәа, ашьҭаҵарҭақәа рҭагылазаашьа ҭаҳҵаауеит агәаҭарақәа раан, ҳәа иҳәеит Аршба арадиоефир аҿы.
"Агәаҭарақәа мҩаԥган аҳҭнықалақьи егьырҭ араионқәеи рҿы. Макьана инагӡаӡам дара, аха есышықәса аҭагылазаашьа еиҳа-еиҳа еиӷьхоит. Абылраҽацәыхьчаратә маругақәа рыла рҽеиқәдыршәоит, аха урҭ ахьыҟамгьы ыҟоуп", - иҳәеит иара.
Апиротехника ухы иаурхәаанӡа уаԥхьароуп иану аԥҟарақәа, дара классла еихшоуп, ашәарҭара зцу, ихьанҭоу ахәыҷқәа рнапаҿы иҟамлароуп.
Иаҳа инеиҵыху аиҿцәажәара шәазыӡырҩыр шәылшоит аудиофаил аҿы.