АҞӘА, ԥхынҷкәын 25 - Sputnik, Асмаҭ Ҵәыџьԥҳа. "Аҿкчымазарақәа риммунопрофилактиказ" азакәан Апарламент актәи аԥхьарала ирыдыркылеит.
Иара ишьақәнаргылоит аҿкчымазарақәа риммунопрофилактика аусхк аҟны аҳәынҭқарратә политика ашьаҭақәа – ауааԥсыра рсанитар-епидемиологиатә шәарҭадара аиҿкаареи ауааԥсыра ргәабзиара ахьчареи хықәкыс иҟаҵаны.
Ари аҩыза азакәан адкылара мзызс иаиуит ачымазарақәа рацәахо иахьалагаз.
Азакәан апроект иазԥхьагәанаҭоит Аминистрцәа реилазаара ишьақәнарӷәӷәаз алаҵаҟаҵаратә мзари алаҵақәа рыҵәахра аҭахрақәеи. Аминистрцәа реилазаара ишьақәнаргылароуп реиҳа ирылаҵәо ачымазарақәа зхәышәтәуа ауаа рзанааҭқәа реиқәыԥхьаӡа, урҭ азанааҭқәа знапы рылаку хымԥада алаҵа рзыҟарҵалароуп.
Азакәан иара убасгьы иазԥхьагәанаҭоит арҭ атәылауаа алаҵашьҭахьтә уашәшәырара рызцәырҵыр, асоциалтә дгылара рыҭара анормақәа. Асеиԥш аан атәылауаа есымза аԥаратә харҭәаа рыҭареи аԥаратә цхыраара аиуреи рзы азин рымоуп.
Иара убасгьы адепутатцәа актәи аԥхьарала аԥсахрақәа рыларгалеит закәанԥҵаратә актқәак. Аиҭакрақәа рпроект цәыргоуп "Аҿкчымазарақәа риммунопрофилактиказ" азакәан адкыларазы анормақәа реиҿкаара хықәкыс иҟаҵаны. Убас, аиҭакрақәа аларгалоит "Агәабзиарахьчараз" азакәан - Аԥсны иҟоу, инхо аҳәаанырцәуаа хәыда-ԥсада амедицинатә цхыраара рыҭара, алаҵа рзыҟаҵаразы алшара рыҭара ахәҭаҟны.