АҞӘА, ԥхынҷкәын 25 - Sputnik. Очамчыра араион ахәҭак иахьа уажәраанӡагьы лашарада иҟоуп ацәаҳәақәа ахьыԥҵәаз азы ҳәа Sputnik иазеиҭеиҳәеит араион ахада Беслан Бигәаа.
Иара иҳәеит аенергетикцәа аусура ишаҿу.
Ԥхынҷкәын 25 ашьыжь амҩа зегьы аҿы икаҳаз аҵлақәа ықәганы идрыцқьеит. Бигәаа иажәақәа рыла, аҩнеихагылақәа рхыбқәа реиҭашьақәыргылара иалагоит излауала ирццакны.
Иара иҳәеит араион ахадарахь ишынашьҭу ахатәыҩнқәа рыԥшәмацәа рҟынтә арзаҳалқәа, урҭгьы ацхыраара шрыҭахо.
Sputnik иара убас Тҟәарчал араион ахадара аҽрыманадеит. Араион ахада Исидор Дочиа иажәақәа рыла, амҩақәа рыцқьоуп, алашара ԥхынҷкәын 24 ахәылбыҽха зехьынџьара иоушьҭын.