Ашықәс ҿыц аныҳәазы акырџьара атәылақәа рҟны асы шьҭоуп. Аԥсны акәзар Риҵа, Ауадҳара рҿы акәымзар, шамахамзар аҵыхәтәантәи ашықәсқәа рзы аныҳәаан асы ануԥыло маҷуп. Ашықәс ҿыц аныҳәа Риҵа ишаԥыло, арҭ амшқәа рзы уахь аҭыԥантәи ауаа халома, иҟоума атуристцәа абарҭқәа ртәы еиҭеиҳәеит Риҵатәи амилаҭтә ҳәырԥсарра атуризми аекскурсиақәеи рыҟәша аиҳабы Етлан Багаҭелиа.
Сынтәа идыргылаз аԥсаӡ ҵыԥхтәи аасҭа метрак еиҳауп, аура 9 метрак инаӡоит. Уи аҟаза ирԥшӡаны илырхиеит, хәылбыҽхала арлашагақәа анаку ауаа рфотоқәа ҭырхырц ихалоит иҳәеит Багаҭелиа. Иара иазгәеиҭеит, сынтәа аныҳәазы Риҵа аԥсаӡ акәшамыкәша ирҩычан, даҽа аамҭанык еиԥшымкәа ирԥшӡан ҳәа. Ауадҳара акәзар, асы 2-2,5 метра шьҭоуп, уахь аӡын аусзуҩцәа роуп ихало, аҭааҩцәа рыдыркылартә иҟам, амҩа аркуп, асыԥсақәа леилоит ҳәа иҳәеит Багаҭелиа.
Аицәажәара шәаҳар шәылшоит аудиофаил аҟны хыхь.