Хьыбла Гьерзмааԥҳа диит Пицунда ажьырныҳәа 6 1970 шықәсазы. Дшыхәыҷыз ашәаҳәареи ароиаль арҳәареи далагеит.
Хьыбла Гьерзмааԥҳа Аҟәатәи амузыкатә ҵараиурҭа далганы 1989 шықәсазы дҭалоит Москватәи аконсерваториа, қәҿиарала далгоит 1994 шықәсазы.
Раԥхьаӡа акәны Хьыбла Гьерзмааԥҳа аҳәаанырцә азҿлымҳара лоуит 1993 шықәсазы Буссето имҩаԥысуаз аицлабра "Вердиевские голоса" аҟны ахԥатәи апремиа анлоу. Шықәсык анаҩс Испаниа Виниасеи, Санкт-Петербург имҩаԥысуаз Н. А. Римски-Корсаков ихьӡ зху аицлабреи рыҟны аҩбатәи аҭыԥқәа аанылкылоит. Лыстудентә шықәсқәа раан иреиҳаӡоу аԥхьахә, лара лыда ашәаҳәараҿ макьаны аӡәгьы имоуц 1994 шықәсазы Москва имҩаԥысуаз Чаиковски ихьӡ зху Жәларбжьаратәи аицлабраҟны Хьыбла агран-при даԥсахоит.
Хьыбла Гьерзмааԥҳа иахьа адунеи аоператә сценақәа рыҟны азҿлымҳара ду змоу шәаҳәаҩуп. Лара дықәгылоит иреиӷьӡоу аконцерттә сцена дуқәа - Ла Скала, Ковент-Гарден, Метрополитен-опера, Бавариатәии Римтәии атеатрқәа рыҟны, Венатәи аопера аҟны. Ашәаҳәаҩ адунеи акыр џьара аконцерттә программақәа лыманы агастрольқәа мҩаԥылгоит.
Хьыбла Гьерзмааԥҳа - Аԥсни Урыстәылеи Жәлар рартистка, иланашьоуп апремиақәа "Триумф", "Иреиӷьу аоператә шәаҳәаҩы" ахьыӡҳәаҟны "Casta Diva", илоуит амилаҭтә театр апремиа "Золотая маска" "Иреиӷьу аԥҳәыс лроль" азы, иара убас иланашьоуп "Золотой Орфей" "Иреиӷьу ашәаҳәаҩ" ҳәа.