АҞӘА, ажьырныҳәа 15 - Sputnik. Уажәшьҭарнахыс аҳәаанырцәуаа аџьаама Аиа-Софиа аҩналара ахә ахыршәаалароуп, абри атәы аанацҳауеит РИА Новости, Ҭырқәтәыла акультуреи атуризми рминистрра адыррақәа шьаҭас иганы.
Абилеҭқәа раахәара алшоит иҷыдоу акассаҿы. Уи 25 евро (аҭырқәа лирақәа 830 раҟара, мамзаргьы 2 нызқьи бжаки аурыс мааҭқәа) иаԥсоуп. Ҭырқәтәыла атәылауаа уаанӡеиԥш аџьаама хәыда-ԥсада иҩналар рылшоит.
Ацқьа Софиа луахәама иргылеит ақьырсиан император Иустиниан, уи аартын ԥхынҷкәын 27, 537 шықәса рзы. Зқьышықәса инарзынаԥшуа ауахәама ақьырсиан дунеи аҿы иреиҳау уахәаманы иԥхьаӡан.
Ацқьа Софиа луахәама Константинополь османаа ианрымпыҵархала, Византиатәи аимпериа анеилаҳа ашьҭахь, 1453 шықәса рзы иџьаамоуп ҳәа азҳәан. Аха 1934 шықәса рзы Кемаль Ататиурк иусдҵала амузеи ҳәа астатус аҭаны ИуНЕСКО Адунеизегьтәи аҭынха асиа иаҵаркын.
2020 шықәсазы атәыла ахада Таип Ердоган инапынҵала абааш џьааманы иҟарҵеит, аԥсылманцәа ирнеирҭахеит. Раԥхьаӡа акәны ара анамаз ркит ԥхынгәы 24 2020 шықәсазы. Убри аахыс аҭааҩцәа зегьы рзы уахь анеира хәыдаԥсадан.