АҞӘА, ажьырныҳәа 24 - Sputnik, Бадраҟ Аҩӡба. Аԥсны Аҭҵаарадыррақәа Ракадемиа ахада ихаҭыԥуааи академик-маӡаныҟәгаҩи алхуп.
Аԥсны Аҭҵаарадыррақәа Ракадемиа ахада ихаҭыԥуаас иалхуп Сергеи Бебиеи Ианварби Екбеи.
Уаанӡа иҟаз академик-маӡаныҟәгаҩ Валентин Коӷониа деиҭалхуп ари аҭыԥ аҿы.
ААР ахада, ихаҭыԥуаа, академик-маӡаныҟәгаҩ, апрезидиум аилазаара хәышықәса рахь знык реиҭалхра мҩаԥыргоит.
Уи адагьы, азеиԥш еизараҿы аҵарауаа ҿарацәа рнапаҿы ирыҭан аҭҵаарадыррақәа ркандидат идиплом.
Абиологиатә ҭҵаарадыррақәа ркандидатцәа ҳәа рыхьӡ ҳәоуп: Лолита Гьергьиаԥҳа, Иван Титов, Кристина Багаҭелиаԥҳа, Индира Қриаԥҳа, Елена Џьакониаԥҳа, Алина Сангәлиаԥҳа. Наталиа Чиковани афизика-математикатә ҭҵаарадыррақәа дыркандидатхеит.