АҞӘА, ажьырныҳәа 29 – Sputnik. Москватәи аҳәынҭқарратә жәларбжьаратәи аизыҟазаашьақәа ринститут (МГИМО) ашкол аадыртуеит Аԥснытәи аҳәынҭқарратә университет аҿы. Абри атәы аанацҳауеит АдәАР Амедиацентр.
"ААУ асистемаҿы аус рулоит МГИМО апрофессор-рҵаҩратә еилазаара ахаҭарнакцәа, еицырдыруа аҵарауаа, аполитологцәа. Дара жәларбжьаратәи аизыҟазаашьақәа, аглобалтә економика, ҳаамҭазтәи аимакқәа рхыҵхырҭақәеи иҟалар зылшо рыхҟьаԥҟьақәеи ирылацәажәалоит, атехнологиатәи, аекономикатәи суверенитет ҳазну адунеи аҿы ҭыԥс иааннакыло", - ҳәа ануп адырраҭараҿы.
Ашкол аартразы еицәажәеит Аԥсны Адәныҟатәи аусқәа рминистр Инал Арӡынбеи МГИМО аректор Анатоли Торкунови. Иара убас уи зыбзоурахаз Аԥсны АдәАРи ААУи русеицура ауп.