Амилаҭтә сахьаҭыхымҭатә галереиа аиҭашьақәыргылара азҵаара адгыларазы агәыҳалалратә концерт мҩаԥгахоит аҳәынҭфилармониаҿы жәабранмза 6 рзы. Ари аконцерт иалахәхо, аԥара аизгара шымҩаԥгахо, насгьы аҟәрышь ҷыдала изырхахо уҳәа, арадио Sputnik аефир аҿы азҵаарақәа рҭак ҟаиҵон Аԥсны акультура аминистрра акультуреи аҟазареи рыҟәша аспециалист хада Адамыр Гәынба.
Аконцерт еиҿкахоит Аԥсны аҩнуҵҟа иҟоу арҿиаратә коллективқәеи аестрадатә шәаҳәаҩцәеи рыла ҳәа азгәеиҭеит Гәынба аиҿцәажәараҿы.
"Агәаҳәара змоу зегьы аконцерт ахь инеир рылшоит. Убри аан доусы илшо аԥара акәалаԥ иҭаиршәартә еиԥш азин имоуп. Еизгахо аԥара амилаҭтә галереиа аусзуҩцәеи, асахьаҭыхыҩцәа реидгала алахәылацәеи еилацәажәаны иаҳа иахьахәҭоу ҳәа иахьазырԥхьаӡо иаздырхоит", - ҳәа иҳәеит Гәынба.
Аԥсны акультура аминистрра акультуреи аҟазареи рыҟәша аспециалист хада игәалаиршәеит, уажә аԥхьа иҟаз агәыҳалалратә концертқәа ирнаҭаз аԥышәеи урҭ рлыҵшәеи ртәы.
"Ас еиԥш иҟоу аконцертқәа рацәаӡам. Ауаа макьана иамышьцылацт, ҳаргьы азыҟаҵара ҳагуп уи аганахьала. Ауаа ирызнагалатәуп уи акультура. Иара акультура аминистрра иатәу ахыбрақәа роума, аколлективқәа адгылара рыҭаразы аума, аконцертқәа реиҿкаарахь ҳхьаԥшыр бзиан", - ҳәа иҳәеит Гәынба.
Инеиҵыху аиҿцәажәара шәазыӡырҩыр шәылшоит аудиофаил аҿы.