АҞӘА, жәабран 6 - Sputnik. Аԥсны ахада аладауаԥстәылатәи иколлега Алан Гаглоев иирамш идиныҳәалеит. Абри атәы аанацҳауеит атәыла ахада ипресс-маҵзура.
Бжьаниа иазгәеиҭеит, Аахыҵ Уаԥстәыла ахада Алан Гаглоев инапхгарала аҳәынҭқарра аизҳара амҩа ишану. Иҳәеит аҩ-республикак рыжәларқәа ҭоурыхк ишеиднакыло, ԥышәарак ишеицахысыз рхатәы хьыԥшымра ашьақәыргылараҿы.
"Ҳажәларқәа еимадоуп апатуеиқәҵареи амилаҭ интересқәа рыхьчареи рыҟны. Аԥсны ахә ҳаракны иршьоит ҳабжьара ишьақәгылаз аизыҟазаашьақәа, агәрагьы ргоит ҳаиҩызареи ҳусеицуреи аԥхьаҟагьы ишацҵахо", - ҳәа аҳәоит адныҳәалараҟны.
Бжьаниа Гаглоев изеиӷьеишьеит агәабзиара, аҳәынҭқарра амаҵураҟны аихьӡара ҿыцқәа.