АҞӘА, жәабран 7 - Sputnik, Асмаҭ Ҵәыџьԥҳа. Аԥсны ауааԥсыра аипотека ала анхарҭақәа раахәара рылшоит адепутатцәа актәи аԥхьарала ирыдыркылаз Анхарҭаз азакәанеидкыла инақәыршәаны.
Ари апроект аҿы иазгәаҭоуп еиҭамҵуа амазара ма аипотека шасыс иазынрыжьуа иҷыдоу асоциалтә закәан "Еиҭамҵуа амазара ашасразы" иҳәаақәнаҵараны ишыҟоу. Иазԥхьагәаҭоуп, атәылауаа ркатегориақәак апроцент зыԥҵәа адагьы анхарҭа аахәаразы акредитқәа роур алшо ишыҟало.
Аилыркааратә шәҟәаҿы иаҳәоит аҳәынҭқарра иаус хаданы ишыҟоу атәылауаа зегьы рзы анхарҭа апроблема аӡбара амеханизмқәа раԥҵара, аиҳаракгьы заагарҭа маҷу, урҭ иӷару ркатегориахь иаҵанамкуазаргьы.
Ас иҟоу рзы азакәанеидкылаҿы иарбахоит аилкаара – икоммерциатәым аԥсахра. Иҷыдоу аҭыԥ ааннакылоит ауадарацәа змоу аҩнқәеи амазара аобиектқәеи хәҭалатәи рыргылара азҵаара.
Иахьазы Аԥсны аус ауеит 1981 шықәсазы ирыдыркылаз Анхарҭаз азакәанеидкыла.