Арҭ амшқәа рзы амшын аҟәараҟны иԥсны ирԥыхьашәало аӡы иху, ауаа ирымфо акәата жәла аҭахара зыхҟьазар ауа, ас еиԥш ахҭысқәа уажәаԥхьа аҭыԥ рымазма, насгьы амшыни аԥсыӡқәеи рзы шәарҭара аҵоума атәы арадио Sputnik аефир аҟны далацәажәеит Аԥсны аекологиазы аинститут аиҳабы Роман Дбар.
"Иаҳбалоит есышықәса аӡын амзақәа рзы, иаҳа иахьԥхароу ҳәа аԥсаатәқәа еизоит. Иаҳҳәап, Шәқәырча аганахьала ирацәаны иуԥылалоит. Амшын аҟәараҟны еиҳарак иԥхарроуп, аԥсыӡгьы еизоит. Насгьы аԥсаатә амҩасра аамҭазы ақәра змоу аныҟоу, иара хыԥхьаӡара рацәалагьы ианеиқәшәо, иаҳа ачымазарақәа ҿиоит. Насгьы абри ачымазароуп ирыхьуа ҳәа ашьақәыргылара ҳара ҳзы иуадаҩуп, избанзар ҷыдала ус еиԥш аҿкы ҭызҵаауа алабораториа ҳара иҳамаӡам. Дара аԥсаатәқәа рхымҩаԥгашьала иубаратәы иҟоуп ачымазара шрымоу", - иҳәеит Дбар.
Иара иазгәеиҭеит, ас еиԥш аԥсаатәқәа рҭахара аԥсабраҟны иҿыцу цәырҵраӡам, ашәарҭара зҵоу акы акәны иахәаԥшуам ҳәа.
Аицәажәара шәаҳар шәылшоит аудиофаил аҟны хыхь.