Ҭырқәтәылатәи Ареспубликаҿы иҟоу Аԥсны Аҳәынҭқарра Азинмчы нагӡа змоу Ахаҭарнакра 30 шықәса ахыҵит. Арадио Sputnik аефир аҿы Аԥсадгьыл ахь ахынҳәразы аҳәынҭқарратә еилакы ахантәаҩы Вадим Ҳаразиеи Ҭырқәтәыла инхо ҳдиаспора ахаҭарнак усҟантәи аамҭазы Аԥсны ацхыраара аҭаразы ахеилак иазааԥсахьаз Бедиз Кәарацхьиаԥҳаи иргәаладыршәеит уи шыҟалаз атәы.
1994 шықәса хәажәкырамза 1 азы, Аԥсны Аҳәынҭқарра раԥхьатәи Ахада Владислав Арӡынба иаԥшьгарала, Ҭырқәтәылатәи Ареспублика Сҭампыл ақалақь аҟны иаԥҵан Аԥсны Аҳәынҭқарра Азинмчы нагӡа змоу ахаҭарнакра.
Акыршықәса инеиԥынкыланы Аԥсны Ахаҭарнакра напхгара аиҭон Владимир Аҩӡба, иара убас еиуеиԥшым аамҭақәа рзы ари анапхгара рнапы ианын Инар Гыцбеи Вадим Ҳаразиеи. Ҳазҭагылоу аамҭазы Ҭырқәтәылатәи Ареспублика аҟны Аԥсны Аҳәынҭқарра ахаҭарнакс дыҟоуп Ибраҳим Аҩӡба.
Ахаҭарнакра ахадаратә усура азырхоуп аԥсуа жәлар рмилаҭтә хаҿра аиқәырхара, рҭоурыхтә ԥсадгьыл радԥхьалара, аимадара арӷәӷәара. Аԥсадгьыл ахь ахынҳәразы аҳәынҭқарратә еилаки Ҭырқәтәыла иҟоу Аԥсны Аҳәынҭқарра Ахаҭарнакреи еиуеиԥшым ахырхарҭақәа рыла аусеицуреи аимадареи рыбжьоуп, азеиԥш проектқәа рҳәаақәҵаразы аҭагылазаашьақәа аԥырҵоит.
Уи иазку аиҿцәажәара шәазыӡырҩыр шәылшоит аудиофаил аҿы.