Амшынҭалара аамҭазы Гагра аҟәарақәа рҟны изықәныҟәаша аԥҟарақәа, аҟәарақәа ахьынӡазырхиоу, иарбан усурақәоу имҩаԥгатәны, иӡбатәны ирымоу, арадио Sputnik аефир аҟны еиҭеиҳәеит Гагра араион ахадара акурорти атуризми рыҟәша аиҳабы Ахра Бганба.
"Гагра араион аҟәара ахархәаразы 2022 шықәсазы Араионтә еизара адепутатцәа ирыдыркылаз аԥҟара ҳақәныҟәоит. Иара араион ахадара акәзар аҟәарақәа қьырала изгои ҳареи аиқәшаҳаҭра ҳабжьаҳҵоит. Амшынҭалара аамҭазы аҽыкәабара инеиуа рзы аҟәара хиазароуп. Араион аҟны аҽыкәабаратә сезон ааҳартуеит есышықәса рашәарамза 1 инаркны. Еиҿкаазароуп аҟәаратә маҭәахәқәа, аҳаргьқәа, узыниало аҟәардәқәа. Асанитартә гигиена аԥҟарақәа ирықәшәо иҟазароуп урҭ. Иҟазароуп ашьышьма, аӡрыжәтә ҭыԥқәа, анапыӡәӡәарҭақәа. Амшын аҟны ихызароуп аӡҳәаарбагақәа, амшынӡы акәзар асанитартә шәагазагақәа ирықәшәозароуп. Иара аҟәараҟны амузыкеи абыжьқәеи 45 дицебел еиҳамзароуп", - иҳәеит Бганба.
Иара иазгәеиҭеит ҵыԥх аҟәарақәа ахархәаразы қьырала изгаз аиҳараҩык аԥҟарақәа бжеиҳан ишрықәныҟәоз. Бганба иҳәеит амшынҭалара аамҭа аиаанӡа Гагра аҟәарақәа рҿы аҳәышәҭқәа хәба дыргылараны ишыҟоу.
Аицәажәара иаҳа инеиҵыхны ишәаҳар шәылшоит аудиофаил аҟны хыхь.