Сҭампыл иддырбоит Баграт Шьынқәба ироман "Ацынҵәарах" иалхны ақәыргыламҭа. Иара ҭырқәшәалоуп ишыҟоу. Иалахәуп акәашаратә ансамбльқәа "Ахақәиҭреи" "Нарҭи". Аспектакль режиссиорс дамоуп Мадина Аргәынԥҳа, ахореограф - Ерик Ҭырқьба, амузыка автор - Ҭемыр Агрба. Ақәыргыламҭа Кавказтәи аибашьра нҵәеижьҭеи 160 шықәса аҵра иазкуп. Уи ддырбоит Ҭырқәтәыла, ҭагалан Аԥсныҟа иааргараны иҟоуп. Аԥсуа театр арежиссиор Мадина Аргәынԥҳа арадио Sputnik иазеиҭалҳәеит тәым бызшәала ақәыргыламҭа аус шадылуло, насгьы, иара аспектакль аҟаҵара агәҭакы шцәырҵыз атәы.
Ақәыргыламҭа аҟаҵаразы аидеиа рызцәырҵит аԥсуа театри арепатриациазы аҳәынҭеилаки, амҳаџьырратә хҭысқәа 160 шықәса рхыҵра инамаданы. Ақәыргыламҭа апластикатә ҟазшьа аҭаны иҟаҵоуп ҳәа азгәалҭеит аиҿцәажәараҿы Аргәынԥҳа.
"Аспекталь Ҭырқәтәыла иаанхарц ҳҭаххеит, убри аҟынтә Ҭырқәтәыла иҟоу ансамбльқәа рыкәашаҩцәа роуп иалахәу. Ақәыргыламҭа 58-ҩык ауааԥсыра адгалоуп, ари даара ирацәоуп. Дара зегьы аԥсышәала иҟазарц рҭахын, аха сара Баграт Шьынқәба ибызшәа, ароман иаҳәо зегьы ибзианы еилыркаарц сҭаххеит. Аԥсны иаагахар, хымԥада аԥсышәала ирцәажәахоит. Ақәыргылараҿы ԥынгыла сымаӡамызт, абызшәа сзеилкааӡом, аха атекст бзианы ианудыруа, абызшәа уԥырхагаӡам", - ҳәа лҳәеит Аргәынԥҳа.
Лара лажәақәа рыла, аспектакль аҿар ирзырхоуп, ицҳамҭоуп, ас еиԥш ахҭысқәа уаҳа иҟамларцаз ҳәа лҳәеит Аргәынԥҳа.
Аицәажәара инеиҵыхны ишәаҳар шәылшоит аудиофаил аҟны.