Абызшәа аҿиара иаԥырхагоу азҵаарақәа ирзааҭгылеит атәыла ахада иҿы имҩаԥысыз абызшәадырыҩцәа злахәыз аилатәараҟны. ААУ апедагогикатә факультет апедагогикеи алагарҭатә ҵареи рметодика акафедра аиҳабы, апрофессор Алықьса Касланӡиеи, Атәыла ахада иусбарҭа анапхгаҩы Абессалом Кәарҷиеи арадио Sputnik аефир аҿы ари атемазы ргәаанагарақәа еибырҳәеит.
Атәыла ахада иусбарҭа анапхгаҩы Абесалом Кәарҷиа аиҿцәажәара хацыркуа иҳәеит, ари азҵааразы аилатәара амҩаԥгара заԥшьгаз, насгьы игәаанагарала, Аԥсны ишыҟоугьы аметодикақәеи арҵагатә шәҟәқәеи маҷымкәа, апроблема шыҟац ишаанхо.
"Аусқәа маҷымкәа иҟаҵоуп, аха аԥсышәала ицәажәо маҷуп", - ҳәа азгәеиҭеит иара.
Апрофессор Алықьса Касланӡиа игәаанагарала иҟоу аметодикақәа ажәит, убри аан абызшәа аҵара азҵаараҿы зегьы хазы-хазы аус руеит. Иара иажәақәа рыла, абызшәа аҵаразы иҟоу ацхыраагӡақәа зегьы еилыхтәуп, иҟазароуп системак, уи аԥышәа иахыжьтәуп, насоуп аларҵәара анаҭатәу.
Аицәажәара инеиҵыхны ишәаҳар шәылшоит аудиофаил аҟны.