"Аҵх амузеи аҟны" захьӡу есышықәсатәи акциа мҩаԥысуеит Аҟәа амузеиқәа хԥа рҟны. Аԥсуа ҳәынҭқарратә музеи сынтәа аҭааҩцәа ирыднагало атәы, насгьы хәы змаӡам рекспонатқәа шыҵәаху, урҭ ирҭагылазаашьоу атәы арадио Sputnik иазеиҭеиҳәеит Аԥсуа ҳәынҭқарратә музеи аиҳабы Аркади Џьопуа.
Сынтәа "Аҵх амузеи аҟны" акциа аиҿкаара рыдуп XX ашәышықәса ҭызҵаауа аҟәша аусзуҩцәа, урҭ цәгьа иааԥсаны рус анагара иаҿуп, ҳәа азгәеиҭеит иаҿцәажәараҿы Џьопуа.
"Ицәыргахоит аамҭаказы Алексадр Чачба-Шервашидзе иусугатә маҭәахәқәа Франциатәы иааганы амузеи иарҭахьаз. Урҭ ҵәахуп амузеи афондқәа рҿы. Ацәыӡ ду ашьҭахь ауааԥсыра маҷк ргәы ааҳарҟәандарц ҳаӡбеит. Иара уи адагьы Аџьынџьтәылатәи еибашьра ду иадҳәалоу есыҽнытәи аекспозиа шыҟоугьы, амузеи аусзуҩцәа иҟарҵеит еиҭа астендқәа. Анаҩс амузеи еиҳабыс иҟаз Александр Ҭариа диижьҭеи 100 шықәса аҵра инамаданы, иара изкны ацәыргақәҵагьы ҟалоит", - ҳәа еиҭеиҳәеит Џьопуа.
Амузеи аҭаҵәахқәа ирҭагылазаашьоу, насгьы урҭ рыҵәахра аус ишазнеиуа атәы ишәаҳар шәылшоит аудиофаил аҟны.