Агазеҭ "Республика Абхазия" ажурналист Есма Арџьениаԥҳаи, аиформациатә маҵзура ”Апсныпресс” акоррепондент Аманда Касланӡиаԥҳаи апроект "SputnikPro на Зубовском" аҩбатәи асезон аусура иалахәын. Хәымш рыҩнуҵҟа дара ҳаамҭазтәи амедиа ихадоу ахыхарҭақәа рыла амастер-классқәеи аԥышәатә зыҟаҵарақәеи ирхысит. Ажурналистцәа ироуз аԥышәа ҿыци, апрограмма аиҿкаашьеи, рколлегацәеи дареи реибабара алҵшәақәеи ртәы арадио Sputnik аефир аҿы еиҭарҳәеит.
Аманда Касланӡиаԥҳа ажурналистикаҿы дыҟоижьҭеи шьҭа фышықәса ҵуеит, лара раԥхьаӡа акәны лԥышәа аизырҳара иазку апроект далахәын, уи гәахәара дула илыдылкылеит.
"Аԥсны анҭыҵ ҳцаны, зԥышәа ҳараку ажурналистцәа русушьа абара ҳара ҳзы акырӡа аҵанакуеит", - ҳәа лҳәеит Аманда арадиостудиаҿы.
Есма Арџьениаԥҳа ҩынтәуп "SputnikPro на Зубовском" далахәылоижьҭеи, лара лажәақәа рыла, уажәы ажурналистикаҿы рхы иадырхәо иԥсабаратәым аинтеллект аусушьа абара ԥышәа ҿыцын дара рзы, уи аганахьала ирацәан иҳауз адыррақәа, азгәалҭеит ажурналист.
Аицәажәара инеиҵыхны ишәаҳар шәылшоит аудиофаил аҟны.