Аԥҟараҿы иарбоуп, амҩадуқәа рҿы аҽхышәқәа рыргылара ахьахәҭоу, насгьы изеиԥшразарц ахәҭоу ҳәа азгәеиҭеит аиҿцәажәараҿы Бганба.
"Ҩышықәса раԥхьа арҭ амҩадуқәа рҿы игылан астол, аҳаргь, аскамқәа, аха ҳара иҳадаҳкылеит аԥҟара ҿыц урҭ рхаҭыԥан аҽхышәқәа галазароуп ҳәа. Урҭ рхатә стандартқәа рымоуп. Аус зур зҭаху атурфирмақәа урҭ ирыцныҟәозароуп. Дара иахьдыргылар ахәҭоу азы иаԥҵоуп акомиссиа. Иахьа ақалақь аҩныҵҟа 50 ҽхышә ргылара азин ыҟоуп", - иҳәеит Бганба.
Агәаҭарақәа раан аӡыргаратә стендқәа ықәаҳгеит, урҭ ақалақь ахаҿра дырцәгьоит ҳәа азгәеиҭеит араион ахадара акурорти атуризми рыҟәша аиҳабы.
Бганба иажәақәа рыла, ақалақь аҿы 18 турфирма рҟынӡа аус руеит, иара убас 7-ҩык хаҭалатәи аудкылаҩцәа ҳәа иҭагалоуп. Аӡыргаратә стендқәа ықәаҳгаанӡа урҭ адырра рыҭан ҳәа иҳәеит Ахра.
Аицәажәара инеиҵыхны ишәаҳар шәылшоит аудиофаил аҟны.