АҞӘА, ԥхынгәы 29 - Sputnik. Пицундатәи Жәларбжьаратәи амузыкатә фестиваль аатит ԥхынгәы 29 азы Апатриархтә ныхабааҿы.
Апрограмма жә-хәҭак рыла ишьақәгылоуп. Афестиваль нанҳәа 3 рҟынӡа имҩаԥысуеит. Пицундатәи афестиваль иахҭыс хадахоит "Аԥсуа реквием" анагӡара. Арҿиамҭа раԥхьаӡа акәны иадырҳәеит нанҳәа 14, 2022 шықәсазы Аԥсны жәлар Рџьынџьтәылатә еибашьра алагеижьҭеи 30 шықәса ахыҵра иазкны.
Афестиваль асахьаркыратә напхгаҩы Барас Кәыџба агәыӷра ааирԥшит иара Аԥсны ауааԥсыреи асасцәеи ргәы-рыԥсы иалаҵәап ҳәа.
Кәыџба афестиваль аиҿкааҩцәа, аспонсорцәа. апартниорцәа ҭабуп ҳәа реиҳәеит, ҭабуп ҳәа леиҳәеит Аԥсни Урыстәылеи жәлар рартистка Хьыбла Герзмааԥҳа аконцерт зал ароиаль ҳамҭас иахьалҭаз азы.
Чаиковски ихьӡ зху Москватәи аҳәынҭқарратә консерваториа ахортә дирижиорра акафедра апрофессор, Шнитке ихьӡ зху МГИМ апрофессор Александр Соловиов, сынтәа Аԥсны зҽаԥсазтәыз артист ҳәа ахьӡ иаԥсахаз, иҳәеит ари ахҭыс алахәхара шнасыԥ дуу. Иара иазгәеиҭеит афестиваль амҩаԥгара аԥшьгаҩ - иара иҵаҩы, 2024 шықәсазы Москватәи аконсерваториа иалгақәаз иреиӷьу аҳәаанырцәуаҩ шиакәу Барас Кәыџба.
Аԥхынразтәи акультуратә хҭыс хада аанартит Аԥсны жәлар рартист Нодар Ҷанба дирижиорс дызмоу Аҳәынҭқарратә хортә капелла. Асцена иқәыҩуан аклассикатә рҿиамҭақәа, урҭ нарыгӡон Аԥсны, Азербаиџьан, Ермантәыла, Белорусиа, Китаи, Урыстәыла, Ҭырқәтәыла рартистцәа.