Пицунда ихыркәшахеит Жәларбжьаратәи амузыкатә фестиваль. Аконцерттә программа шьақәгылан Аԥсны, Азербаиџьан, Ермантәыла, Беларус, Китаи, Урыстәыла, Ҭырқәтәыла рҟынтәи иааз амузыкантцәа хатәрақәа рыла. Урҭ инарыгӡон адунеи аҿы еицырдыруа акомпозиторцәа рырҿиамҭақәа реиԥш амилаҭтә аԥҵамҭақәагьы.
Аԥснытәи аҷкәын ас еиԥш аҩаӡара ҳаракы змоу афестиваль ахьеиҿикааз гәахәара дууп ҳәа азгәалҭеит аиҿцәажәараҿы Чачхалиаԥҳа.
"Апрофессионалцәа уанрыхәаԥашуа, хымԥада, аинтерес аҵамлар ҟалаӡом. Уанеиҿаԥшуа улшара иацумҵар залшом. Мчыбжьык иалагӡаны ахортә капелла быжь-ҩык адирижиорцәа ҳамҩаԥыргон. Китаитәи жәлар рашәа наҳагӡон раԥхьаӡа, уигьы даара интересуп. 30 шықәса ҵуеит ара аус зуеижьҭеи, аха китаитәи амузка ҳамҳәаӡацызт", - лҳәеит Чачхалиаԥҳа.
Иаҳа инарҭбааны аиҿцәажәара шәаҳар шәылшоит аудиофаил аҟны.