Аԥсуа ҳәынҭқарратә аҿар ртеатр атрагедиа "Антигона" аԥхьарбара мҩаԥнагеит Аԥсуа театр асценаҿы. Актиорцәа Ахра Кәарҷиеи Вадим Абыхәбеи арадио Sputnik аефир аҟны еиҭарҳәеит инарыгӡо ахаҿсахьақәа, акәыргыламҭа аус адулара шцоз, рхыдҵақәа рынагӡара шрылшаз азы ргәанагара.
Аицәажәара шәаҳар шәылшоит аудиофаил аҟны хыхь.
Ақәыргыламҭа афранцыз драматург Жан Ануи ипиеса "Антигона" ала иаԥҵоуп. Иара 1970-тәи ашықәсқәа раан аԥсшәахь еиҭаргахьан. Ақәыргыламҭа ҿыц аредакциа азиуит атеатр аиҳабы Аслан Еныкь.
Аспектакль аус адырулон мызкы иназынаԥшуа. Ас иуадаҩу ақәыргыламҭа аамҭа кьаҿла аҭыжьра ҳҭоурых аҿы иҟамлацызт ҳәа азгәеиҭахьан Еныкь
"Антигона" ықәлыргылеит урыстәылатәи арежиссиор Викториа Печерникова. Уи тема хадас иамоуп амчра знапаҿы иҟоу асистемеи анхаҩи ринтересқәа реиҿагылара, ари ианакәзаалак актуалра аҵазаауеит ҳәа агәаанагара лымоуп арежиссиор. Лара иара убасгьы илҳәеит ари аспектакль урыстәылатәи афестивальқәа рахь иргар шалшо, уи азы ажәалагалақәа ҩба шроухьоу.
"Антигона" ари амзазы иддырбоит нанҳәа 21 азы.