Аҭоурхҭҵаарадыррақәа ркандидат, Аԥсуҭҵааратә институт археологиа аҟәша аҭҵаарадырратә усзуҩы еиҳабы, Аԥсуа ҳәынҭқарратә музеи аиҳабы Аркади Џьопуа далацәажәеит иахьа археологиатә ҭынха ахьынӡаҭҵаау, аекспедициақәа ирыцу агәалаҟара, насгьы избан аԥсуа археологиа аԥҳәыс лхаҿра замам.
Археологиахь агәыбылра изҭаз атәы далацәажәауа Џьопуа еиҭеиҳәеит, ихәыҷра Аԥсуа баагәара ааигәара ишихигаз.
"Аимара аҳабла ҳахьынхоз ииасуеит Аԥсуа баагәара. Ҳаныхәыҷыз ҳаҩуа абаақәа ҭарҭан, ҳахәмаруан. Абзиабара уантәи ауп иахьыскыз. Нас уи сара исыԥсҭазаарахеит. Археолог аԥхын аиаанӡа ижыга ахра далагоит. Аекспедициахь санбадәықәло ҳәа дыԥшуп", - иҳәеит Џьопуа.
Иара еиҭеиҳәеит, археологиа даналага аамҭаз изҿыԥшуаз шыҟаз. Вадим Бжаниа еидикылеит аҿар, археологиа гәыкала изҭаххаша инаҵишьит Џьопуа.
"80-тәи ашықәса рзы акәын. Ҳара ҳзы инасыԥ дуун археологцәа дууқәа ҳрыдтәалан еибырҳәоз ахьҳаҳауаз", - иҳәоит Џьопуа.
Археолог иара убас иҳәеит, ари азанааҭ зыцааиуагьы дшыҟоу.
"Зурик Мхонџьиа ҳәа ҩызак дҳамоуп, ҳара иахьа хәлаанӡа ҳажуеит, аџьабаа ҳбоит. Ҳҽагеи ҳломи мҩанҵо ҳдәықәуп. Иара дшааиуа акәымкәа ибаҳа нцәыҵиркьакьар, аҽнынтәарак иҳаԥшаауаз аҟынтә еиӷьыз дақәшәон. Убыс ацәанырра иман. Абасала, еснагь ижуагьы ак анизымыԥшаауа дыҟоуп", - иҳәеит Џьопуа.
Иаҳа инарҭбааны аиҿцәажәара шәаҳар шәылшоит аудиофаил аҟны.