АҞӘА, цәыббра 8 - Sputnik. Ансамбль "Мырзакан" ықәгылеит Риазан цәыббрамза 6-7 рзы имҩаԥысуаз Ажәытә қалақьқәа Жәларбжьаратәи рфорум агала-концерт аҿы.
Ансамбль анапхгаҩы Иракли Џьумутиа Sputnik ишазеиҭеиҳәаз ала, Аԥснынтәи инеиз аколлектив инанагӡеит акәашарқәа хԥа — аԥсуа милаҭтә кәашара, ауаԥс кәашара, ашьхарыуаа рыкәашара.
"Ҳақәгылара зықьҩыла ауаа ахәаԥшуан. Даара аемоциақәа аҵаҵаны имҩаԥысит, урыстәылатәи апублика ҳакәашарақәа даара бзиа ирбоит. Иара убас егьырҭ акультурақәа рхаҭарнакцәеи ҳареи ҳаибадырит", – ҳәа азгәеиҭеит Џьумутиа.
"Мырзакан" афорум иалахәын Аԥсны иҟоу Россотрудничество ахаҭарнакра адгыларала.