Жәларбжьаратәи аҿартә арт-фестиваль "Аԥшаҳәаҿы аныҟәарақәа" цәыббра 25 рзы амҩаԥгара рҽазыҟарҵоит Амилаҭтә библиотекаҿы. Сынтәа уи шеиҿкаахо, иалахәхарц зылшо, апрограмма шышьақәылахо, ҷыдала темак азалххо атәы арадио Sputnik аефир аҟны еиҭалҳәеит Амилаҭтә библиотека аиҳабы ихаҭыԥуаҩ Амза Агрԥҳа.
Аҿар рҟазара ацхыраара аҭара, уи аҿиара, аарԥшра хықәкыс иамоуп афестиваль, лҳәеит Агрԥҳа. Сынтәа уи Дырмит Гәлиа диижьҭеи 150 шықәса аҵра иадҳәалоуп. Лара лгәаанагарла ас еиԥш арт-фестиваль амҩаԥгара алҵшәа амоуп, аҿар абиблиотека иаднаԥхьалоит, ашәҟәыԥхьара бзиа иднарбоит. Бжьаратәла афестиваль 400-ҩык раҟара аҭаауеит, лҳәеит Агрԥҳа.
Аицәажәара инеиҵыхны ишәаҳар шәылшоит аудиофаил аҟны хыхь.