АҞӘА, цәыббра 16 - Sputnik. Аԥсны адәныҟатәи аусқәа рминистрра ахҳәаа анаҭеит Қырҭтәыла анапхгаратә партиа "Грузинская мечта" ахантәаҩы Биӡина Иванишвили Қырҭтәыла апарламенттә алхрақәа рҟны аиааира аныргалак, апартиа 2008 шықәсазтәи аибашьразы Аахыҵ Уаԥстәыла ажәлар рҿаԥхьа аҭамзаара ашьҭаҵаразы агәаӷьра шаадырԥшуа азы иҳәамҭа.
Аусбарҭаҿы ишырҳәаз ала, асеиԥш аҳәамҭа, аинышәарахь ареалтә шьаҿақәа ҟаҵазар, ииасыз аамҭа агхақәа ахәшьара ҿыц рыҭазар, аполитикатәии аекономикатәии қәыӷәӷәаратә методқәа мап рыцәкызар, ҭынчымҩала аицынхареи агәылеимабзиареи рахь апроцесс аҟны раԥхьатәи ашьаҿақәа иреиуахар ауеит.
"Ҳақәгәыӷлап Иванишвили игәҭакқәа гызмалрада, игәы разны дрылацәажәоит, ииашоу ажәақәагьы Аԥсны ажәлар рганахьала иԥшаауеит, Аԥсни Қырҭтәылеи Аахыҵ Уаԥстәылеи Қырҭтәылеи рыбжьара амч ахамырхәаразы жәларбжьаратәи ахәдықәҵарақәа рзы аҭакԥхықәра адызҵаша адокумент анапаҵаҩра аус аҟны иажәеи иуси еивыгахарым ҳәа", — аҳәоит Аԥсны АдәАР аҳәамҭа.