1993 шықәса сентиабр 16 рзы аԥсуа ар Аҟәа ахақәиҭтәразы ажәылара иалагеит. Урҭ амшқәа рзы имҩаԥысуаз ахҭысқәа, арадио Sputnikаефир аҟны игәалаиршәеит Гәымсҭатәи афронт актәи абригада ахԥатәи абаталион адҵаҟаҵаҩ ихаҭыпуаҩс иҟаз, Леон иорден занашьоу Аслан Дгьебиа.
Аӷацәа ишыриааиуа, аԥсадгьыл шҭадырцәуа, Аԥсынра аԥсуаа ишрыдгьылу азы агәрагара еснагь иҟан, уи атәы иалацәажәон, аха имриамызт ампыҵахалыҩцәа ралцара аҳҭнықалақь, уи азы аҽазышәарақәа изныкымкәа иҟаҵан ҳәа азгәеиҭеит аибашьра аветеран.
"Иахьа ҳшыҟоу зегьы ижәбоит. Иахьеи усҟан ҳшыҟази даараӡа еиԥшӡам. Усҟан аӡәы ишьапы кыдҟьар, зегьы ҳидгалон, абри акы имыхьындаз ҳәа, аха зегь раасҭа иаҳҭахыз гәыла, мчыла, хыла ҳаԥсадгьыл аҭарцәра акәын. Аԥсра аӡәгьы иҭахӡам, аха уи ҳазхәыцӡомызт. Афырхацәа амедалла акәӡам ишыԥхьаӡатәу, аибашьра иалахәны иҟарҵаз ала ауп. Аԥсынра, ҳауаажәлар ҳзыхьчандаз ҳәа акәын ҳгәы иҭаз, инаҳагӡеит",- иҳәеит Дгьебиа.
Аицәажәара инеиҵыхны ишәаҳар шәылшоит аудиофаил аҟны хыхь.