"Афырхацәа рхылҵшьҭрақәа" захьзу алагер мҩаԥысуеит арҭ амшқәа рзы Аԥсны. Аџьынџьтәылатә еибашьра аветеранцәеи, хатәгәаԥхарала еибашьуаз рмаҭацәеи, Курсктәи аобласт аҟынтәи ахәыҷқәеи рзы жәамш рыҩныҵҟа еиҿкаахоит аҵарадырратәи, аспорттә программа. Арадио Sputnik аефир аҿы аҿари аспорти русқәа рзы Аԥсны аҳәынҭқарратә еилакы, аҿар рыҟәша аиҳабы Идрис Кара-осман-оглы еиҭеиҳәеит, ахәыҷқәа раамҭа шырхырго, насгьы алагер аиҿкаара хықәкыс иамоу атәы.
Курскнтәи алагерь иалахәуп 39-ҩык ахәыҷқәа, Аԥснынтә 50-ҩык инареиҳаны аҿар, 10-ҩык раҟара Нхыҵ-Кавказнтәи. Ахәыҷқәа ирхылаԥшуеит аиҳабацәа. Агәыԥқәа зегьы еихшаны алагерь аусура иалагахьеит, иҳәеит аиҿцәажәараҿы Кара-осман-оглы.
"Алагер аҵак ду амоуп. Ҳҭоурых абиԥара ҿыц ирхамышҭырц, урҭ рнаҩс еиҭа еиҵагыло аҿар ирарҳәаларц ҳҭахуп аибашьра ахҭысқәа", - ҳәа азгәеиҭеит Кара-осман-оглы.
Иаҳа инарҭбааны аиҿцәажәара шәаҳар шәылшоит аудиофаил аҟны.