Ешыратәи абжьартә школ аиҭашьақәыргылара мҩаԥысуеит нанҳәамза аахыижьҭеи. Уи ахыркәшара аназгәаҭоу, аҵаҩцәа аамҭала аҵара ахьырҵо, ашкол аҟны шаҟаҩы аҵара рҵо, машьынала еиқәшәоума, арадио Sputnik аефир аҟны еиҭалҳәеит ашкол аиҳабы Фатима Сақаниаԥҳа.
Ашкол иагу рацәоуп, аха уажәазы хадаратәла иҟаҵатәу ҳәа иалкааны ацхырааразы иззыҳәаз ҟарҵоит, уахь иаҵанакуеит ашкол адәахьтәи ахаҿра, аспорттә зал, ашкол анапхгареи арҵаҩцәеи руадарақәа, лҳәеит Сақаниаԥҳа.
Лара лажәақәа рыла, ашкол аҟны мҽхакы ҭбаала аиҭашьақәыргыларатә усурақәа мҩаԥымсеижьҭеи ҩажәаҟа шықәса ҵуеит, егьыс араион аҵараҟәша аҟынтәи есышықәса ацхыраара рырҭалон акласстә уадақәа рҿы арҽеиратә усқәак рымҩаԥгаразы.
Ешыратәи ашкол аиҳабы илҳәеит жьҭаарамзазы рхыбраҟны аҵара апроцесс иалагап ҳәа агәыӷра шрымоу. Ашкол ахь иныҟәо иахьазы 63-ҩык аҵаҩцәа ыҟоуп. Сақаниаԥҳа илҳәеит аҵаҩцәа мҩанызго ашколтә транспорт шажәыз, уи аганахьала ауадаҩрақәа шрымоу.
Аицәажәара шәаҳар шәылшоит аудиофаил аҟны хыхь.
Ареспубликатә биуџьет аҟынтәи Ешыратәи абжьаратә школ аиҭашьақәыргыларатә усурақәа ирзоужьуп 6,5 миллион мааҭ. Уажәазы, ашколхәыҷқәа Гәымсҭатәи ашкол аҩбатәи асменахь иныҟәоит.