АҞӘА, цәыббра 24 - Sputnik. Аԥсни Аахыҵ Уаԥстәылеи Қырҭтәылаҟа ихынҳәуам, уи ҟалашьа амам. Абри атәы иҳәеит "Газете.Ru" аинтервиу азҭаз, ИАР атәылақәа русқәа рзи, евразиатәи аинтеграциази, аџьынџьуаа рымадарази Аҳәынҭдума аилак ахантәаҩы актәи ихаҭыԥуаҩ Константин Затулин.
Затулин игәаанагарала Қырҭтәыла анапхгара алхрақәа рыламҭалаз ауаԥсаа рҿаԥхьа аҭамзаара шьҭарҵоит 2008 шықәсазы Саакашьвили иҟаиҵаз азы, аха уи Аԥсни Аахыҵ Уаԥстәылеи архынҳәуам.
"Урыстәылагьы ареспубликақәа рыӡбра иақәыӷәӷәараны иҟам, усеиԥш џьоукы агәаанагара шрымоугьы. Ҳара Аԥсни Аахыҵ Уаԥстәылеи разхаҵара аҽа знеишьак ҳамоуп. Аамҭа маҷк азы ихәарҭахар ма ихәарҭамхар зылшо афеидазы ҳаӡбра ҳаԥсахӡом", — азгәеиҭеит Затулин.
Адепутат иҳәеит Урыстәылагьы, Аԥснгьы, Аахыҵ Уаԥстәылагьы ареспубликақәа рҳәынҭқарратә зхаҵара иацәхьаҵуам.