АҞӘА, цәыббра 29 - Sputnik. Аҽыбӷаҟазаратә еицлабрақәа хыркәшоуп Мықә ақыҭан.
Аӡбаҩ хада ихаҭыԥуаҩ Денис Серликов иажәақәа рыла, азеиԥшкомандатә еихшьаалақәа рыла, ахраҿа аиуит Кәтол ақыҭа акоманда. Аҩбатәи аҭыԥ ргеит арасаӡыхьааи баслахәааи, ахԥатәи - тамшьаа.
Аицлабрақәа абас еихшан:
1200 метра иҟаз абжьаӡараҟны раԥхьа днеит Оксана Џьыкырԥҳа аҽан Фаира дақәтәаны;
1600 метра иҟаз абжьаӡараҿы актәи аҭыԥ игеит Дмитри Қардиа аҽыҩ Батистута дақәтәаны;
Қардиа иара убас раԥхьа днеит 2000 метра иҟаз абжьаӡараҿы аҽыҩ Инатов дақәтәаны.
Аҽыбӷаҟазаратә еицлабрақәа еиҿыркааит Аҿари аспорти рзы Аҳәынҭеилакы очамчыратәи аҟәша, урҭ Аԥсны жәлар Рџьынџьтәылатә еибашьраан игаз Аиааира Амш иазкын. Мықәашҭа даҭааит Аԥсны ахада Аслан Бжьаниа.