Аҟәа атроллеибустә цәаҳәа Ақырҭаа имҩа аҟынтәи Ладариа имҩахь ииагахоит. Ас еиԥш ала ацагамҩа ашьақәыргылара зазыӡбаз, еилкааума ианаларгахо атроллеибусқәа уи ахырхарҭала рныҟәара, анхамҩа уадаҩрақәас иамоу атәы, арадио Sputnik аефир аҟны еиҭеиҳәеит Атроллеибустә нхамҩа анџьныр хада Енвер Чамагәуа.
Ҩышықәса ҵуеит атроллеибусқәа Ҭҳәыбын ахырхарҭала Алашарбагеи Синопи рыбжьара имныҟәеижьҭеи, избанзар уахь лассы афымцалашара еиԥҟьон, убасгьы икаҳаз аҵлақәа иажәыз ацәаҳәа ааха арҭеит, иара ашьаҟәақәагьы рхархәара аамҭа ииасит, ҳәа азгәеиҭеит Чамагәуа. Иара иҳәеит аамҭак ашьҭахь алшара ҟалар, ажәытә хырхарҭала атроллеибусқәа дәықәҵахар шалшо.
Иара иазгәеиҭеит атроллеибусқәагьы шажәыз, 15 шықәса раԥхьа ишроухьаз.
"Атроллеибусқәа ҿыцны ианҳарҭа нахыс ахархәаразы аҽҳәара 10 шықәса ауп иамоу. Иара уи аҽҳәара аҩныҵҟа ҩынтә-хынтә акапиталтә ремонт ҟаҵатәуп. Зныкгьы иҟаҵаӡам, избанзар аҟазацәа ҳамаӡам. Краснодарынтә даҳзаауеит аӡәы, излауала ишьақәиргылоит, убасала аус руеит ҳатроллеибусқәа. Акадрқәа разымхара ҳамоуп, иаиааит ауаа аусурҭа раҳҭоит", - иҳәеит Атроллеибустә нхамҩа анџьныр хада.
Иара иажәақәа рыла, атроллеибус ныҟәазҵо руалафахәы мызқәак раԥхьа ишьҭыхын 20 нызқь мааҭ рҟынӡа, убасгьы ҽнак ирзарбоу аплан иахашәало дара иртәуп.
Атроллеибустә нхамҩа анџьныр хада иазгәеиҭеит ацәаҳәақәа ахьажәу иахҟьаны ианԥҵәо, урҭ амашьынақәа ианрықәҳауа ахҭысқәа шыҟоу.