Аԥсны аиҳабыра ишьақәдырӷәӷәеит Аҭҵаарадыррақәа ракадемиа иатәу Аботаникатә институт адендропарк аҳәаақәа. Аекологиазы Аԥсны аҳәынҭқарратә еилакы ахантәаҩы Савели Ҷыҭанааи Аботаникатә институт аиҳабы Едуард Гәбази арадио Sputnik аефир аҿы иалацәажәеит адендропарк аԥеиԥш, ауааԥсыра гәатәгәаԥхарала имҩаԥырго аргыларақәа ртәы, иара убас апарк аҷыдарақәа.
Адендропарк 64,3 гектар иҟоуп. Ҷыдала иаԥҵаз акомиссиа апарк аҳәаақәа закәанла ишьақәнаргылахьан. Аминистрцәа реилазаара Аппарат анапхгаҩы Давид Сангәлиа ишиҳәаз ала аҵакыра зегьы ҭахкаам, уи иахҟьаны хаԥышәала аргыларақәа анымҩаԥырго ыҟоуп. Апарк аиқәырхаразы аԥыза-министр Александр Анқәаб Афинансқәа рминистрра аандакәыршазы аԥара азоунажьырц анапы ианиҵеит.
Савели Ҷыҭанаа еиҭеиҳәеит, иарабан усуроу имҩаԥнагаз акомиссиа, избан иҟаз аҳәаақәа реиҭашьақәыргылара залмыршахаз, насгьы Акапиталтә ргаларатә усбарҭа аҿаԥхьа идҵаны ишықәгылоу аанда аргыларазы.
Гәбаз иажәақәа рыла, Аԥснытәи адендропарк аӡбахә адунеи аҿы ирдыруеит, хәы змаӡам аҵиаақәа уа еизҳауеит, Амшынеиқәа ӡҭачаҿы иҟаӡам уа еизҳауа. Адендропарк аанда ахьамамыз иахҟьаны изакәымыз иазныҟәон ҳәа азгәеиҭеит аиҿцәажәараҿы Гәбаз.
Иаҳа инарҭбааны аиҿцәажәара шәаҳар шәылшоит аудиофаил аҟны.