Жьҭаара 25-27 рзы Аԥсны аҳҭнықалақь аҿы имҩаԥысраны иҟоуп "Аҟәа-марафон", уи алахәхаразы аҽҭаҩра мҩаԥысуеит. Еиҳа инарҭбааны ари аспорттә хҭыс шымҩаԥысуа атәы арадио Sputnik аефир аҿы еиҭеиҳәеит, еиҭаиҳәеит аиҿкааҩцәа ируаку, Аҿари аспорти русқәа рҿы Аԥсны аҳәынҭеилакы аҿар рыҟәша аиҳабы Идрис Кара-османоӷлы.
"Аҟәа-марафон" ахәыҷтәы еицлабра мҩаԥысуеит жьҭаара 26 рзы, адуцәа рзы аицлабра мҩаԥысуеит жьҭаара 27 рзы х-бжьаӡарак рыла: 42,2 километра, 21,1 километра, 5 километрак. Амарафон аҳәаақәа ирҭагӡаны амузыкатәи, амилаҭтә чысқәеи амилаҭтә ҩи рфестивальқәеи мҩаԥгахоит.
Аԥсны азы хҭыс дууп Аҟәатәи амарафон, насгьы амҽхак даара идууп, ҳәа азгәеиҭеит аиҿцәажәараҿы Кара-османоӷлы. Иара еиҭеиҳәеит, аусмҩаԥгатә аԥшьгара шыҟалаз, ишымҩаԥысуаз аиҿцәажәарақәа.
"1000 инареиҳаны аспортсменцәа ҳарзыԥшуп Урыстәылантәи. Уа иҟоуп зегьы еицырдыруа ахьӡқәа, абизнес иадҳәалоу. Дара абра иҩны, рдаҟьақәа рҿы ирҳәо, ирыҩуа Аԥсназы даара акырӡа аҵанакуеит", - ҳәа иҳәеит Кара-османоӷлы.
Иаҳа инарҭбааны аиҿцәажәара шәаҳар шәылшоит аудиофаил аҟны.