Абҵара 3 рзы аҽаҩраныҳәа "Лыхнашҭа" мҩаԥгахоит. Сынтәа 40 шықәса ҵуеит аныҳәа еиҿыркаауеижьҭеи. Аҽаҩраныҳәа мҩаԥыргоит 1984 шықәса раахыс, акоронавирустә пандемиа аныҟаз ада.
Ҟәланырхәа ақыҭа ахада Руслан Гәлиа арадио Sputnik аефир аҟны еиҭеиҳәеит Лыхны имҩаԥгахо аҽаҩраныҳәа рышҽазыҟарҵо, ишазнеиуа, сынтәа анхацәа рыурақәа зеиԥшроу атәы.
"Аҽазыҟаҵара ҳаҿуижьҭеи хәыҷык ҵуеит. Анхаҩы иааирыхуа зегьы рыхкы цәырҳгап ҳәа ҳгәы иҭоуп, ишахәҭоу еиԥш ҳазнеип ҳәа ауп ақыҭақәа иҟоу рыгәҭа ҳалагыланы", - иҳәеит Гәлиа.
Сынтәа аныҳәа 40 шықәса ахыҵра инамаданы, иаҳа инарҭбааны иахьазгәарҭо аҟынтә уи зҽалазырхәыр зҭаху анхацәа рацәаҩуп, иаҳа иазҿлымҳауп иҳәеит Гәлиа.
"Сынтәа убасгьы ҷыдала аԥацхақәа рҿаԥхьа ахәыжәбыцала ишшаны аандақәа ҟалоит, уи ақыҭақәа зегьы ҳаицәажәаны иалаҳгалеит", - иҳәеит Гәлиа
Аицәажәара инеиҵыхны ишәаҳар шәылшоит аудиофаил аҟны хыхь.
Аныҳәа "Лыхнашҭа" иалахәхоит Гәдоуҭа ақыҭақәеи, Афон ҿыц ақалақьи, Ҟарачы-Черқьестәылатәи аделегациеи.
Аныҳәа иалахәу зегьы иӡырыргоит рхатәы аалыҵ, рҽаҩра, инаргоит рнапкымҭақәа, еиҿыркаауеит ацәыргақәҵақәа. Лыхнашҭа иқәгылоит акәашаратәии авокалтәии аколлективқәа, аԥсуа естрада ашәаҳәаҩцәа, имҩаԥгахоит аҽырыҩреи амилаҭтә хәмаррақәеи.