Иара иажәақәа рыла, ажәытә цәаҳәақәа анхацәа аԥхын аамҭазы ауадаҩрақәа рызцәырнагон, аӡы ахархәара уи аамҭаз иаҳа ирацәахон азы. Убри ианамаданы ҩышықәса раԥхьа ихацыркын Кьалашәыр ахықәан анансостә станциа аҟаҵара. Аобект аҿы аусурақәа хыркәшан ҵыԥх, сынтәа уи ақыҭа иаҿганы аӡымҩангага ашьҭаҵара иаҿуп. 6 нызықь метра шьҭаҵатәуп, ашықәс нҵәаанӡа аусурақәа хыркәшатәуп. Иахьазы 70% рҟынӡа аусурақәа нагӡоуп, мызкы аҩныҵҟала ҳалагап ҳәа ҳгәыӷуеит, иҳәеит Ҷыҭанаа.
Баслаҭа 500 ҭӡы инарзынаԥшуа иҟоуп, 2000 инареиханы ауаа нхоит. Апроект ҩ-хәҭакны ишоуп. Баслаҭеи Ӡыгәҭеи ӡыла реиқәыршәаразы. Баслаҭа мацара ицо аусурақәа 24 миллион мааҭ артәоуп, ари араионтә биуџьет алоуп ишыҟаҵоу, азгәеиҭеит Ҷыҭанаа.
"Ари қыҭак аҿы апроблема ӡбахоит, аха егьырҭ рҿы макьана иаанхоит. Аӡы ахархәара аԥҟара ақәныҟарагьы ауаа ирцәыуадаҩхеит. Ҩадахьы инхо ауаа уахгьы-ҽынгьы аӡы аартны ауҭра ианақәырҭәо, ладахьы инхо аӡы рыцәмаҷхоит. Убри иахҟьаны агәынамӡарақәа рацәаны иҟоуп. Ари аус аҿы ауаа рыхдыррагьы аҭахуп, - ҳәа иҳәеит Ҷыҭанаа.
Инеиҵыху аиҿцәажәара шәазыӡырҩыр шәылшоит аудиофаил аҿы.